ꍏꍔꑠꊯꌕꈭꇖꃢꃀꆏꄜꑘꊈꑼꉼꃅꇴꌊꃀꈿꌐꌠꃅ

ꅑ1ꆪ8ꑍꄮꈉ17ꂷꇄꌠꑟꇬ，ꀉꒉꃀꄜꑘꊤꆏꉬꇮꃅꄉꇬꄜꑘ464ꐘꎴꊊ

1ꆪ8ꑍꈊꃀ，ꍏꍔꑠꊯꌕꈭꇖꃢꄜꑘꊈꑼꉼꃀꆏꌌꀒꎂꄉꈿ，ꎴꊊꌠꍔꑠꄜꑘꈧꌠꌌꏓꋧꃅꍤꌋ。

ꏹꍒꃀꈿꅉꄉꅉꐚꅜꇬ，ꅑ1ꆪ8ꑍꄮꈉ17ꂷꇄꌠꑟꇬ，ꍔꑠꆃꎭꍏꊯꌕꈭꊈꑼꉼꇖꃢꃀꈿꄜꑘꊤꆏꄜꑘ464ꐘꎴꊊ。ꄚꈪꄙꇬ，ꊈꑼꊨꏦꑴꅉꀋꉬꀐꇬꇷꃅꄉꄜꎼꇁꌠꆏꄜꑘ349ꐘꐥ，ꄈꃆꌤꀞꁥꌠꆏ115ꐘꄜꎼꇁ，ꄜꑘꄜꈽꌠꊈꑼ240ꑹꐥ，ꊻꂷ666ꑼꃢꑟ。

ꉜꎼꇁꇬ，ꋌꃢꃀꈿꏓꎴꊊꌠꄜꑘꅇꀨꆹꊨꄅ，ꐊꐨꆹꀉꑌ、ꏡꁈꑌꑭꋧ，ꊇꁧꑌꉬꇮꃅꀊꂥꏭꃅꐙꌐ，ꄈꍔꀋꉬꀋꉆꃅꉜꁨꌠꀂꏾꑌꏓꋧ，ꐧꋦꃅꇫꊂꉜꁨꌠꀂꏽꑌꏓꋧ、ꉹꁌꉈꇬꑓꑣꌠꌋꆀꊋꋠꐨꀂꏽꑌꏓꋧ，ꋍꏅꊈꑼꌋꆀꍔꑠꂱꑱꌤꃅꅉꄚꃀꈿꈽꇁꌠꍔꍞꆽꎍꐨ、ꃅꐨꆽꎍꐨꌋꆀꆽꎍꐨꀵꄜꌠꀂꏽꃅꍔꆙꎼꇁꌐ。